កម្ពុជា​ស្នើបង្កើតបណ្តាញហ្វ្រង់កូហ្វូនី ដើម្បីបង្ការជម្លោះ និងពង្រឹងការសម្របសម្រួល

ملخص مفصل

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើបង្កើតបណ្តាញហ្វ្រង់កូហ្វូនី សម្រាប់ការបង្ការជម្លោះ និងការសម្របសម្រួល ដោយប្រមូលផ្តុំអ្នកការទូត អ្នកជំនាញ…

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើបង្កើតបណ្តាញហ្វ្រង់កូហ្វូនី សម្រាប់ការបង្ការជម្លោះ និងការសម្របសម្រួល ដោយប្រមូលផ្តុំអ្នកការទូត អ្នកជំនាញ និងស្ថាប័ននានារបស់ប្រទេសសមាជិក ដើម្បីជំរុញការសន្ទនា និងទប់ស្កាត់ជម្លោះមុនពេលឈានដល់ការប្រឈមមុខដាក់គ្នា។

ថ្លែងក្នុងពិធី​បើក​កិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ កាលពីថ្ងៃទី១៥ ខែវិច្ឆិកា សម្តេចធិបតី ហ៊ុន ម៉ាណែត បានលើកឡើងថា ការ​បង្ការ​ជម្លោះ​តាំង​ពីដំណាក់កាល​ដំបូង​មាន​សារៈ​សំខាន់​ជាង​ការរង់ចាំដោះស្រាយផលវិបាកក្រោយពេលសង្គ្រាមកើតឡើង។ សម្ដេច​ស្នើ​ឱ្យ​បង្កើតបណ្តាញហ្វ្រង់កូហ្វូនីមួយ ដែលអាចភ្ជាប់អ្នកការទូត អ្នកជំនាញ និងស្ថាប័នពាក់ព័ន្ធ ដើម្បីជួយសម្របសម្រួលការសន្ទនាតាមសំណើរបស់ប្រទេសសមាជិក។

សម្ដេច​ធិបតី​បានបញ្ជាក់ថា៖ «បណ្តាញនេះនឹងជួយសម្រួលដល់ការសន្ទនា មុនពេលជម្លោះឈាន​ទៅ​ដល់​ការប្រឈមមុខដាក់គ្នា ដោយសង្កត់ធ្ងន់ថា ការបង្ការ​ជម្លោះ​តែងតែចំណាយតិចជាង​ការកសាង​ប្រទេស​ឡើងវិញក្រោយសង្គ្រាម»។

បើ​តាម​សម្ដេច​នាយករដ្ឋមន្ត្រី ការ​បន្ត​និយាយ​ពី​សន្ដិភាព​របស់​កម្ពុជា​ ក៏​ព្រោះ​ប្រទេស​នេះ​ធ្លាប់​ឆ្លង​កាត់​សង្គ្រាម និងបានយល់ពីតម្លៃនៃសន្តិភាព ដោយ​បាន​រំលឹកពីសារៈសំខាន់នៃការបង្កើតទំនុកចិត្ត ការសន្ទនា និងការគោរពច្បាប់អន្តរជាតិ ដើម្បីធានាស្ថិរភាពយូរអង្វែង។

សំណើនេះក៏ស្របទៅនឹងសាររបស់កិច្ចប្រជុំកំពូលហ្វ្រង់កូហ្វូនីលើកទី២០ ក្រោមប្រធានបទ «វិនិយោគ​ឡើងវិញលើសន្តិភាព ដើម្បីវិបុលភាពរួម និងស្ថិរភាពយូរអង្វែង» ដែលផ្តោត​លើ​ការពង្រឹងកិច្ចសហប្រតិបត្តិការអន្តរជាតិ និងការរក្សាសន្តិភាព។

ជាមួយគ្នានេះ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរ៉េស (António Guterres) ដែលបានថ្លែងតាមប្រព័ន្ធអនឡាញក្នុងពិធីបើកកិច្ចប្រជុំកំពូល ក៏បានអំពាវនាវ​ឱ្យ​ប្រទេស​នានា​គាំទ្រការទូត ការពារច្បាប់អន្តរជាតិ និងពង្រឹងពហុភាគីនិយម ដើម្បីជំរុញសន្តិភាព។

លោក ហ្គូទែរ៉េស បានលើកឡើងថា សហគមន៍ហ្វ្រង់កូហ្វូនីមានតួនាទី​សំខាន់​ក្នុងការ​លើក​កម្ពស់សន្តិភាព ដោយចាត់ទុកភាសារួមថាជាមូលដ្ឋាននៃទំនុកចិត្តរវាងប្រទេសសមាជិក។

សំណើរបស់កម្ពុជានេះបង្ហាញពីបំណងចង់ពង្រីកតួនាទីរបស់ហ្វ្រង់កូហ្វូនី មិនត្រឹមតែជាសហគមន៍​ដែលមាន​ភាសា និងវប្បធម៌រួមប៉ុណ្ណោះទេ ប៉ុន្តែថែមទាំងជាវេទិកាសម្រាប់ការទូត ការបង្ការជម្លោះ និងការកសាងសន្តិភាពផងដែរ៕

مطلع المقال، مقتطف من កម្ពុជាថ្មី Kampuchea Thmey. لقراءة المقال كاملًا، افتحه على موقع الناشر.